അങ്കമാലി: വയനാട് ദുരന്തത്തിൽ പെട്ടവർക്ക് കൈതാങ്ങാകാൻ പ്രൈവറ്റ് ബസ് ഓപ്പറേറ്റേഴ്സ് അസോസിയേഷൻ അങ്കമാലി യൂണിറ്റിന്റെ നേതൃത്വത്തിൽ 3 ദിവസങ്ങളിൽ ബസുകൾ സർവീസ് നടത്തും. ബസിലെ ജീവനങ്ങാർ ടിക്കറ്റും കണ്ടക്ടർ ബാഗും ഒന്നുമില്ലാതെ ബക്കറ്റുമായാണ് യാത്രക്കാരെ സമീപിക്കുന്നത്. യാത്രക്കാർക്ക് അവർക്ക് ഇഷ്ടമുളള തുക ബക്കറ്റിൽ നിക്ഷേപിക്കാം. പിരിഞ്ഞ് കിട്ടുന്ന തുകയും, ഉടമകളുടെയും, ജീവനക്കാരുടെയും വരുമാനവും ചേർത്ത് മുഖ്യമന്ത്രിയുടെ ദുരിതാശ്വാസനിധിയിലേക്ക് കൈമാറും. 100 ഓളം ബസ്സുകളാണ് 3 ദിവസങ്ങളിലായി സർവീസ് നടത്തുന്നത്. 7,8,9 തിയതികളിലാണ് ബസ് സർവീസ്.
7 ന് അങ്കമാലി – പെരുമ്പാവൂർ, അത്താണി, പറവൂർ, മാള, കണക്കൻകടവ് റൂട്ടുകളിലും 8 ന് മലയാറ്റൂർ, മഞ്ഞപ്ര, മൂക്കന്നൂർ റൂട്ടുകളിലും 9 ന് കാലടി – കാഞ്ഞൂർ -ആലുവ, വട്ടപ്പറമ്പ്, കൊരട്ടി, പാലിശ്ശേരി എന്നീ റൂട്ടുകളിലും ആയിരിക്കും ഈ രീതിയിൽ സർവീസ് നടത്തുന്നത്. വയനാടിന് ഒരു കൈത്താങ്ങ് എന്ന് എഴുതിയ പ്രത്യേക ടീഷർട്ട് ധരിച്ച ജീവനക്കാരായിരിക്കും അന്നേദിവസം ബസ്സുകളിൽ ഡ്യൂട്ടി ചെയ്യുന്നതെന്നും ബസ് ഓപ്പറേറ്റേഴ്സ് അസോസിയേഷൻ പ്രസിഡന്റ് ഏ.പി ജിബി, സെക്രട്ടറി ബി.ഒ ഡേവിസ് എന്നിവർ അറിയിച്ചു.
ബസ് സർവീസിന്റെ ഉദ്ഘാടനം ബുധനാഴ്ച രാവിലെ 9 ന് കാലടി ബസ്റ്റാൻഡിൽ വച്ച് പ്രൈവറ്റ് ബസ് ഓപ്പറേറ്റേഴ്സ് ഫെഡറേഷൻ സംസ്ഥാന പ്രസിഡന്റ് കെ.കെ. തോമസ് ഫ്ലാഗ് ഓഫ് ചെയ്ത് നിർവഹിക്കും. കാലടി ഗ്രാമപഞ്ചായത്ത് പ്രസിഡന്റ് ഷൈജൻ തോട്ടപ്പള്ളി, പഞ്ചായത്ത് അംഗം പി.ബി.സജീവ് എന്നിവർ പങ്കെടുക്കും.
