അങ്കമാലി: അങ്കമാലി അർബൻ സഹകരണ സംഘത്തിലെ ക്രമക്കേടുകളുടെ പേരിൽ കോൺഗ്രസ്സ് പാർട്ടിക്കും ജനപ്രതിനിധികൾക്കുമെതിരെ മാർക്‌സിസ്റ്റ് നേതാക്കൾ നടത്തുന്ന വ്യാജപ്രചരണങ്ങൾ സംസ്ഥാന സഹകരണ വകുപ്പൻറേയും സി.പി.എം ഏരിയ സെക്രട്ടറിയുടേയും പങ്ക് മറച്ച് വയ്ക്കാനെന്ന് കോൺഗ്രസ്സ് ബ്ലോക്ക് പ്രസിഡൻറുമാരായ ആന്റു മാവേലിയും സെബി കിടങ്ങേനും ആരോപിച്ചു.
അർബൻ സഹകരണ സംഘത്തിലെ നിക്ഷേപകരുടെ താൽപ്പര്യങ്ങൾ സംരക്ഷിക്കേണ്ട ചുമതല എല്ലാവർക്കുമുണ്ട്. കോൺഗ്രസ്സ് പാർട്ടി ഇക്കാര്യത്തിൽ നിക്ഷേപകരോടൊപ്പം നിൽക്കും. സംഘത്തിൽ നടന്നതായി പറയുന്ന ക്രമക്കേടുകൾ അന്വേഷിച്ച് ഉത്തരവാദികളെ കണ്ടെത്തി നഷ്ടപ്പെട്ട തുക തിരിച്ച് പിടിക്കാനുള്ള ഉത്തരവാദിതം സംസ്ഥാന സർക്കാരിനും സഹകരണവകുപ്പിനുമാണ്. അർബർ സഹകരണ സംഘത്തിലെ നിയമോപദേഷ്ടാവായി പ്രവർത്തിച്ചിരുന്ന സി.പി.എം ഏരിയാ സെക്രട്ടറിക്കും ഉത്തരവാദിത്വത്തിൽ നിന്ന് ഒഴിഞ്ഞ് മാറാനാവില്ലെന്ന് കോൺഗ്രസ്സ് പറഞ്ഞു
സഹകരണ സംഘത്തിന്റെ പ്രവർത്തനങ്ങൾ കാലാ കാലങ്ങളിൽ പരിശോധിച്ച് ക്രമക്കേടുകൾ കണ്ടെത്തി അവ പരിഹരിക്കുന്നതിന് സഹകരണ വകുപ്പ് ഇൻസ്‌പെക്ടർമാരേയും ഓഡിറ്റർമാരേയും നിയമിച്ചിട്ടുണ്ട്. വർഷം തോറും സഹകരണ വകുപ്പ് ഉദ്യോഗസ്ഥർ പരിശോധിച്ച് തയ്യാറാക്കുന വരവ് ചെലവ് കണക്കുകളും ഓഡിറ്റ് റിപ്പോർട്ടും ന്യൂനതാ സംഗ്രഹവും അച്ചടിച്ച് ഓഹരി ഉടമകൾക്ക് നൽകുകയും സംഘത്തിൻറെം വാർഷിക പൊതുയോഗം വിളിച്ച് ചേർത്ത് പാസ്സാക്കേണ്ടതുമാണ്. ഓരോ ലോണും ക്യത്യമായി പരിശേധിച്ച് നിയമാനുസ്യതമാണെന്ന് ഉറപ്പ് വരുത്തേണ്ട ഉത്തരവാദിത്വം സഹകരണ വകുപ്പിനുണ്ട്. കഴിഞ്ഞ ഏഴ് വർഷമായി സംസ്ഥാന ഭരണം കയ്യാളുന്നത് ഇടത് മുന്നണിയാണ്.
സി.പി.എം അങ്കമാലി ഏരിയ സെക്രട്ടറിയും അദ്ദേഹത്തിൻറെ സ്വന്തക്കാരുമാണ് അർബൻ ബാങ്കിൻറെ ലീഗൽ അഡൈ്വസർമാരായി ഇക്കാലമത്രയും പ്രവർത്തിച്ചത്. ഈ കാലയളവിൽ സംഘത്തിൽ നടന്നതായി പറയുന്ന ക്രമക്കേടുകൾക്ക് ഇവർക്കൊക്കെ ഉത്തരവാദിത്വമുണ്ട്. ഇത് മറച്ച് വച്ച്‌കൊണ്ടാണ് സംഘത്തിൽ അംഗത്വമോ ഇടപാടുകളോ ഇല്ലാത്ത പ്രതിപക്ഷത്തിരിക്കുന്ന എം.പിയേയും എം.എൽ.എയേയും വിവാദങ്ങളിലേക്ക് വലിച്ചിഴക്കാൻ മാർക്‌സിസ്റ്റ് നേതാക്കൾ ശ്രമിച്ച് കൊണ്ടിരിക്കുന്നത്. ഇത് ദുരുദ്ദേശപരമാമാണെന്ന് കോൺഗ്രസ്സ് കുറ്റപ്പെടുത്തി
അർബൻ സഹകരണ സംഘത്തിലെ ക്രമക്കേടുകൾ പുറത്ത് വരുമ്പോൾ അങ്കലാപ്പിലാകുന്നത് മാർക്‌സിസ്റ്റ് പാർട്ടിയുടെ ചില നേതാക്കൻമാരാണ്. സംഘത്തിൽ ബിനാമി പേരുകളിൽ നിക്ഷേപവും ചിട്ടി ഇടപാടുകളുമുള്ള നേതാക്കൻമാർ കോൺഗ്രസ്സ് പാർട്ടിയുടേയും എം.എൽ.എയുടേയും എം.പിയുടേയും മേൽ കുതിരകയറാതെ കക്ഷിരാഷ്ട്രീയം മാറ്റിവച്ച് നിക്ഷേപകരുടെ താൽപ്പര്യം സംരക്ഷിക്കാനാണ് ശ്രമിക്കേണ്ടത്. വിലകുറഞ്ഞ പ്രചാരണങ്ങളിലൂടെ കോൺഗ്രസ്സ് പാർട്ടിയെ കരിവാരിത്തേച്ച് യഥാർതഥ പ്രതികളായ സംസ്ഥാന സർക്കരിനേയും സഹകരണ വകുപ്പിനേയും വെള്ള പൂശാനുള്ള ഇടത് നേതാക്കളുടെ ശ്രമം ഓഹരി ഉടമകളും നിക്ഷേപകരും തിരിച്ചറിയണം.
നിക്ഷേപകരുടെ പണം തിരിച്ച് കിട്ടാനുള്ള പരിശ്രമത്തിൽ കോൺഗ്രസ്സ്പാർട്ടി നിക്ഷേപകരോടൊപ്പം നിൽക്കുമെന്നും കുറ്റക്കാർക്കെതിരെ നിയമനടപടി സ്വീകരിക്കണമെന്നും കോൺഗ്രസ്സ് ആവശ്യപ്പെട്ടു.
