കാലടി: ആദിശങ്കര ഇൻസ്റ്റിറ്റ്യൂട്ട് ഓഫ് എഞ്ചിനീയറിംഗ് ആൻഡ് ടെക്നോളജിയിലെ 11 വിദ്യാർത്ഥികൾക്ക് ജർമ്മനിയിൽ ജോലി ലഭിച്ചു. 2019 – 23 അധ്യായന വർഷത്തെ മെക്കാനിക്കൽ വിഭാഗം വിദ്യാർത്ഥികളായ അദ്വൈത് കെ ബാബു, കെ. എസ് അക്ഷയ്, എ. എം അഫ്ത്താബ്, ടി. എം അമൽ, കെ. സാൻജോ, ജോയൽ ഷാജി, കാളിദാസ് എസ് നായർ, മുഹമ്മദ് സലീജ്, സഞ്ജയ് സന്തോഷ്, ശ്യാം സിബി, സെബാസ്റ്റ്യൻ ജോസ് എന്നിവർക്കാണ് ഈ മികച്ച നേട്ടം കൈവരിക്കാനായത്.
ക്യാമ്പസ് സെലക്ഷനിലൂടെയായിരുന്നു വിദ്യാർത്ഥികളെ തെരഞ്ഞെടുത്തത്. ജർമ്മനിയിലെ മെക്കട്രോണിക്സ് വിഭാഗത്തിലെ പ്രമുഖ കമ്പനികളിലാണ് വിദ്യാർത്ഥികൾക്ക് ജോലി ലഭിച്ചിരിക്കുന്നതും. മികച്ച സാലറിയും ഇവർക്കുണ്ട്.
ജോലി ലഭിച്ച വിദ്യാർത്ഥികളെ കോളേജിൽ നടന്ന ചടങ്ങിൽ അനുമോദിച്ചു. ആദിശങ്കര മാനേജിങ് ട്രസ്റ്റി കെ. ആനന്ദ് വിദ്യാർത്ഥികൾക്ക് ഉപഹാരം നൽകി. പ്രിൻസിപ്പാൾ ഡോ. എം. എസ് മുരളി, സീനിയർ അസോസിയേറ്റ് ഡയറക്ടർ ഡോ. ജേക്കബ് ജോർജ്, മെക്കാനിക്കൽ വിഭാഗം മേധാവി ഡോ. കെ. കെ എൽദോസ് തുടങ്ങിയവർ സംസാരിച്ചു. കഴിഞ്ഞ 3 വർഷത്തിനുള്ളിൽ 42 കുട്ടികൾക്ക് ക്യാമ്പസ് സെലക്ഷനിലൂടെ ജർമ്മനിയിൽ ജോലി ലഭിച്ചിട്ടുണ്ട്.
