അങ്കമാലി : അങ്കമാലി പുളിയനത്ത് വീടിനുളളിൽ മരിച്ച നിലയിൽ കണ്ടെത്തിയ ദമ്പതികളുടെ ഇളയ മകനും മരിച്ചു. ആസ്തിക്ക് സനൽ (6) ആണ് മരിച്ചത്. ഗുരുതരമായി പൊള്ളലേറ്റ് ചികിത്സയിലിരുന്നു ആസ്തിക്ക്. പുളിയനം മില്ലുംപടി ഭാഗത്ത് താമസിക്കുന്ന വെളിയത്ത് വീട്ടിൽ സനൽ (40) ഭാര്യ സുമി (35) എന്നിവരെയാണ് ഇന്ന് വെളുപ്പിന് മരിച്ച നിലയിൽ കണ്ടെത്തിയത്. സനൽ വീടിന്റെ ഉത്തരത്തിൽ തൂങ്ങി മരിച്ച നിലയിലും സുമി കട്ടിലിൽ പൊള്ളലേറ്റ നിലയിലുമായിരുന്നു.
വീട്ടിൽ നിന്നും കുട്ടികളുടെ നിലവിളി കേട്ട അയൽവാസി ഓടിച്ചെന്നു നോക്കിയപ്പോൾ വീട്ടിൽ നിന്ന് തീ പടരുന്നതാണ് കണ്ടത്. ഗ്യാസ് സിലിണ്ടറിന്റെ പൈപ്പ് തുറന്നിട്ടാണ് തീ കൊളുത്തിയിരിക്കുന്നത്. തീപിടുത്തത്തിൽ ഇവരുടെ മക്കളായ അശ്വന്ത് സനൽ (12) ആസ്തിക്ക് സനൽ (6) എന്നിവർക്ക് പരിക്കേറ്റിരുന്നു. അശ്വന്തിന്റെ പരിക്ക് ഗുരുതരമല്ല. കാലടി ബ്രഹ്‌മാനന്ദോദയം സ്‌ക്കൂളിലെ ഒന്നാം ക്ലാസ് വിദ്യാർത്ഥിയാണ് ആസ്തിക്ക്.
സനലും സുമിയും തുറവൂരിൽ അക്ഷയ സേവന കേന്ദ്രം നടത്തുകയാണ്. ആത്മഹത്യയെന്നാണ് പ്രാഥമിക നിഗമനം
