അങ്കമാലി: 10-ാം ക്ലാസ് വിദ്യാർത്ഥി വീടിനകത്ത് ഫാനിൽ തൂങ്ങി മരിച്ച നിലയിൽ. ചെങ്ങമനാട് കപ്രശ്ശേരി വടക്കുഞ്ചേരി വീട്ടിൽ ജെയ്മിയുടെ മകൻ അഗ്‌നലാണ് (15) മരിച്ചത്. വെള്ളിയാഴ്ച വൈകിട്ട് സ്‌കൂളിൽ നിന്ന് വീട്ടിലെത്തി ഭക്ഷണം കഴിഞ്ഞ് മുറിയിലേക്ക് പോയ ശേഷമായിരുന്നു സംഭവം.നെടുമ്പാശ്ശേരി വിമാനത്താവളത്തിലെ ടാക്‌സി ഡ്രൈവറായ ജെയ്മി ജോലി കഴിഞ്ഞെത്തിയിട്ടും വാതിൽ തുറക്കാതായതോടെ ചവുട്ടി തുറക്കുകയായിരുന്നുവത്രെ. അപ്പോഴാണ് തൂങ്ങിയ നിലയിൽ കണ്ടെത്തിയത്.
ഉടനെ കുടുംബാംഗങ്ങൾ ദേശം സി.എ.ആശുപത്രിയിലെത്തിച്ചെങ്കിലും മരണം സംഭവിച്ചിരുന്നു. മൃതദേഹം ആശുപത്രി മോർച്ചറിയിൽ. സ്‌കൂളിലോ,വീട്ടിലോ ആത്മഹത്യക്കിടയാക്കുന്ന പ്രശ്‌നങ്ങളോ, വഴക്കോ ഉണ്ടായിരുന്നില്ലെന്നാണ് പറയുന്നത്.സഹോദരി: എയ്ഞ്ചൽ.
