അങ്കമാലി: നിരവധി കേസുകളിലെ പ്രതികളെ കാപ്പ ചുമത്തി നാട് കടത്തി. അയ്യമ്പുഴ ചുള്ളി കോളാട്ടുകുടി വീട്ടിൽ ടോണി ഉറുമീസ് (35) . ചെങ്ങമനാട് കുന്നുകര അയിരൂർ തെറ്റമ്മേൽ വീട്ടിൽ ജിഷ്ണു ( മഹേഷ് 29) എന്നിവരെയാണ് നാട് കടത്തിയത്. ടോണിയെ ഒരു വർഷത്തേക്കും, ജിഷ്ണുവിനെ ആറ് മാസത്തേക്കുമാണ് നാട് കടത്തിയത്. ജില്ലാ പോലീസ് മേധാവി വൈഭവ് സക്‌സേനയുടെ റിപ്പോർട്ടിന്റെ അടിസ്ഥാനത്തിൽ റേഞ്ച് ഡി ഐ ജി പുട്ട വിമലാദിത്യയാണ് ഉത്തരവിട്ടത്. കൊരട്ടി, അങ്കമാലി, എളമക്കര, മാള പോലീസ് സ്റ്റേഷൻ പരിധികളിൽ കൊലപാതക ശ്രമം, കഠിന ദേഹോപദ്രവം, കൂട്ടായ്മ കവർച്ച, ദേഹോപദ്രവം, വിശ്വാസ വഞ്ചന തുടങ്ങി നിരവധി കേസുകളിൽ പ്രതിയാണ് ടോണി. കൊരട്ടി പോലീസ് രജിസ്റ്റർ ചെയ്ത വഞ്ചന കേസിൽ പ്രതിയായതിനെ തുടർന്നാണ് നടപടി.
ജിഷ്ണു ചെങ്ങമനാട് പോലീസ് സ്റ്റേഷൻ പരിധിയിൽ കൊലപാതക ശ്രമം, ദേഹോപദ്രവം, ഭീഷണിപ്പെടുത്തൽ അടിപിടി, അന്യായമായി സംഘം ചേരൽ തുടങ്ങി നിരവധി കേസുകളിൽ പ്രതിയാണ്. ജനുവരിയിൽ ചെങ്ങമനാട് പോലീസ് രജിസ്റ്റർ ചെയ്ത കൊലപാതകക്കേസിൽ പ്രതിയായതിനെ തുടർന്നാണ് നടപടി.
