അങ്കമാലി: മഞ്ഞപ്ര മേരിഗിരിയിൽ ഇടമലയാർ കനാലിൽ ഒഴുക്കിൽപെട്ട ആറാം ക്ലാസിൽ പഠിക്കുന്ന രണ്ടു പെൺകുട്ടികളെ അത്ഭുതകരമായി രക്ഷപ്പെടുത്തി. നാട്ടുകാരനായ സെബാസ്റ്റ്യൻ ഈരാളിയാണു കുട്ടികളെ രക്ഷപ്പെടുത്തിയത്. കുട്ടികൾ കാൽകഴുകുന്നതിനിടെയാണ് അപകടമുണ്ടായത്. കനാൽ ബണ്ട് റോഡിലൂടെ ബൈക്കിൽ വരികയായിരുന്ന സെബാസ്റ്റ്യൻ കനാലിലേക്കു ചാടി ഒഴുകിപ്പോയ കുട്ടികളെ പിടിച്ചു നിർത്തി. കുട്ടികളുടെ നിലവിളി കേട്ടെത്തിയ സമീപത്തെ വീട്ടുകാർ കയർ കനാലിലേക്ക് ഇട്ടുകൊടുത്തു.
ഒഴുക്കിൽപ്പെട്ട സ്ഥലത്ത് മുകളിലേക്കു കയറാൻ പടികൾ ഇല്ലാത്തതിനാൽ മൂവർക്കും ഏറെ നേരം കയറിൽ പിടിച്ചു നിൽക്കേണ്ടി വന്നു. നാട്ടുകാരുടെ സഹായത്തോടെയാണു കരയ്ക്കു കയറിയത്. കുട്ടികളെ ഉടനെ തന്നെ അങ്കമാലിയിലെ സ്വകാര്യ ആശുപത്രിയിൽ എത്തിച്ചു. കുട്ടികളെ രക്ഷപ്പെടുത്തിയ സെബാസ്റ്റ്യൻ ഈരാളിയെ നാട്ടുകാർ ആദരിച്ചു. മഞ്ഞപ്ര പഞ്ചായത്ത് പ്രസിഡന്റ് വത്സലകുമാരി വേണു, വൈസ് പ്രസിഡന്റ് ബിനോയ് ഇടശേരി, മെംബർമാരായ സൗമിനി ശശീന്ദ്രൻ, സി.വി.അശോക് കുമാർ, സീന മാർട്ടിൻ, സിജു ഈരാളി എന്നിവരുടെ നേതൃത്വത്തിലായിരുന്നു.ആദരം.
