കാലടി: കളമശേരി സ്ഫോടനത്തിൽ പരിക്കേറ്റ മലയാറ്റൂർ സ്വദേശി പ്രവീണും ( 24 ) മരണത്തിന് കീഴടങ്ങി. സ്ഫോടനത്തിൽ പ്രവീണിന്റെ അമ്മ സാലിയും, സഹോദരി 12 വയസുകാരി ലിബ്‌നയും മരിച്ചിരുന്നു. ഇതോടെ കളമശേരി സ്ഫോടനത്തിൽ മരണം ആറായി. സ്ഫോടനം നടന്നശേഷം അതീവ ഗുരുതരാവസ്ഥയിൽ കൊച്ചിയിലെ സ്വകാര്യ ആശുപത്രിയിൽ ചികിത്സയിലായിരുന്നു പ്രവീൺ. അമ്മയും സഹോദരിയും മരണത്തിന് കീഴടങ്ങിയതറിയാതെയാണ് പ്രവീൺ ജീവിതത്തിൽ നിന്നും മടങ്ങിയത്. പ്രവീണിന്റെ സഹോദരൻ രാഹുലിനും
സ്ഫോടനത്തിൽ പരിക്കേറ്റിരുന്നു.
സ്ഫോടനത്തിൽ പൊള്ളലേറ്റ സഹോദരിയെ രക്ഷിക്കാൻ ശ്രമിക്കുന്നതിനിടെയാണ് പ്രവീണിൻ്റെ ശരീരത്തിൽ തീ പടർന്ന് പിടിക്കുന്നത്. കപ്പലിൽ ജോലിക്കാരനായിരുന്നു. കൺവെൻഷനിൽ പങ്കെടുക്കാൻ ലീവിന് എത്തിയതായിരുന്നു പ്രവീൺ
സാലിയും മക്കളായ ലിബ്ന, പ്രവീൺ, രാഹുൽ എന്നിവർ ഒന്നിച്ചാണ് കളമശ്ശേരിയിൽ യഹോവയുടെ സാക്ഷികളുടെ സമ്മേളനത്തിന് എത്തിയത്. പാചകത്തൊഴിലാളിയായ പിതാവ് പ്രദീപൻ ജോലിയുള്ളതിനാൽ കളമശ്ശേരിയിലേക്ക് പോയിരുന്നില്ല.
