മുവാറ്റുപുഴ: മുവാറ്റുപുഴ ലത ബസ് സ്റ്റാൻഡിൽ ബസ് കാത്തുനിന്ന യുവാക്കളെ പോലീസ് സ്‌ക്വാഡ് എന്ന വ്യാജേന എത്തി ബാഗ് പരിശോധിച്ച് പണവും മൊബൈൽ ഫോണും കവർന്ന കേസിലെ പ്രതികൾ പിടിയിൽ. മുവാറ്റുപുഴ മുളവൂർ പെരുമറ്റം, കുളുമാരി ഭാഗത്ത് താമസിക്കുന്ന തൊടുപുഴ താലൂക്ക് വെങ്ങല്ലൂർ സ്വദേശി ചേനക്കരകുന്നേൽ നിപുൻ അബ്ദുൽ അസീസ് (അപ്പു 34 ), മുളവൂർ വില്ലേജ് പേഴക്കാപ്പിള്ളി കരയിൽ പള്ളിചിരങ്ങര ഭാഗത്ത് പാലത്തിങ്കൽ അർഷാദ് അലിയാർ (45) എന്നിവരെയാണ് മുവാറ്റുപുഴ ഇൻസ്‌പെക്ടർ പി.എം,ബൈജുവിന്‍റെ നേതൃത്വത്തിൽ അറസ്റ്റ് ചെയ്തത്.
പ്രതികളിൽ ഒരാളായ നിബുൻ തൊടുപുഴ പോലീസ് സ്റ്റേഷൻ പരിധിയിൽ പോലീസ് ഉദ്യോഗസ്ഥന്‍റെ ഡ്യൂട്ടി തടസപെടുത്തിയതിന് റിമാൻഡ് ആയി ജാമ്യം ലഭിച്ച് ജയിലിൽ നിന്നിറങ്ങിയ അന്ന് തന്നെ ആണ് ഈ സംഭവം. നിബുനെതിരെ നിലമ്പൂർ, ധർമടം, തൊടുപുഴ, മുവാറ്റുപുഴ, കോതമംഗലം എന്നിവിടങ്ങളിൽ ആയി നിരവധി മോഷണ, പിടിച്ചുപറി കേസുകൾ നിലവിൽ ഉണ്ട്.അർഷാദിനെതിരെ മുവാറ്റുപുഴ സ്റ്റേഷനിൽ നിരവധി മോഷണ, അടിപിടി കേസുകൾ ഉണ്ട്. പ്രതികളെ വൈദ്യപരിശോധനകൾക്കുശേഷം കോടതിയിൽ ഹാജരാക്കി റിമാൻഡ് ചെയ്തു.
ഡി വൈ എസ് പി മുഹമ്മദ് റിയാസിന്‍റെ മേൽനോട്ടത്തിലുള്ള അന്വേഷണസംഘത്തിൽ എസ് ഐ മാഹീൻ സലിം, അസിസ്റ്റൻറ് സബ് ഇൻസ്‌പെക്ടർ പി.സി.ജയകുമാർ, സീനിയർ സിവിൽ പോലീസ് ഓഫീസർമാരായ ജയൻ, ബിബിൽ മോഹൻ എന്നിവരും ഉണ്ടായിരുന്നു.
