കാലടി: മലയാറ്റൂരിൽ നടന്ന കൊലപാതകക്കേസിലെ പ്രതിയെ റിമാൻഡ് ചെയ്തു. മലയാറ്റൂർ പയ്യപ്പിള്ളി ടോമി (46) യെയാണ് റിമാൻഡ് ചെയ്തത്. ബന്ധുവായ ടിന്റോയാണ് കുത്തേറ്റ് മരിച്ചത്. പ്രതിയെ സംഭവസ്ഥലത്തെത്തിച്ച് തെളിവെടുപ്പ് നടത്തി. ടോമിയുടെ സഹോദരിയുടെ മകനാണ് ടിന്റോ.
മലയാറ്റൂർ-കോടനാട് പാലത്തിനു സമീപം റോഡരികിലെ മുട്ട ബജി കടയ്ക്കു മുന്നിൽ ചൊവ്വാഴ്ച്ച വൈകിട്ട് 4.45ന് ആണ് ഇവർ തമ്മിൽ തർക്കം ഉണ്ടായത്. ഈ കടയിലെ ജീവനക്കാരനാണ് ടോമി. കട തുറക്കുന്നതിനു ടോമി ഒരുക്കം നടത്തുമ്പോൾ ടിന്റോ അവിടെയെത്തി. ഇരുവരും തമ്മിൽ വാക്കേറ്റമുണ്ടായി. ടിന്റോ ആക്രമിക്കാൻ ചെന്നപ്പോൾ ടോമി കടയിലെ കത്തിയെടുത്ത് കുത്തുകയായിരുന്നു. കഴുത്തിൽ കുത്തേറ്റ് ടിന്റോയെ അങ്കമാലി എൽഎഫ് ആശുപത്രിയിൽ എത്തിച്ച പ്പോഴേക്കും മരിച്ചു.
ഇരുവരും തമ്മിൽ വൈരാഗ്യം ഉണ്ടായിരുന്നെന്നും നേരത്തെയും വാക്കേറ്റവും കയ്യേറ്റവും ഉണ്ടായിട്ടുണ്ടെന്നും നാട്ടുകാർ പറഞ്ഞു. ടിന്റോ ഏറെ നാളായി വീട്ടിൽ നിന്നു മാറി നിൽക്കുകയാണ്. ലോഡ്ജിലാണ് താമസം. സ്ഥിരമായ ജോലിയില്ല.
