കാലടി: പുതുപ്പളളി തെരഞ്ഞെടുപ്പുമായി ബന്ധപ്പെട്ട തർക്കത്തെ തുടർന്നുണ്ടായ ആക്രമണത്തിൽ ഒരാൾക്ക് വെട്ടേറ്റ സംഭവത്തിൽ പ്രതിയുടെ അറസ്റ്റ് രേഖപ്പെടുത്തി. സിപിഎം പൊതിയക്കര ബ്രാഞ്ച് സെക്രട്ടറി കുന്നേക്കാടൻ വീട്ടിൽ ദേവസി (70) യെയാണ് കാലടി പോലീസ് അറസ്റ്റ് ചെയ്തത്. പൊതിയക്കര ജോൺസൻ (52) എന്നയാൾക്ക് നേരെയാണ് ആക്രമണമുണ്ടായത്. അങ്കമാലിയിലെ സ്വകാര്യ ആശുപത്രിയിൽ ചികിത്സയിലിരിക്കുന്ന ജോൺസന് തലയ്ക്കും, ശരീരത്തിന്റെ മറ്റ് ഭാഗങ്ങളിലും പരിക്കേറ്റിട്ടുണ്ട്.
ഇന്ന് രാവിലെ പൊതിയക്കര കോർപ്പറേഷൻ കവല ഭാഗത്ത് വച്ചായിരുന്നു സംഭവം. സ്കൂട്ടറിൽ ഇരിക്കുകയായിരുന്ന ജോൺസനെ, ദേവസി വാക്കത്തിക്ക് വെട്ടുകയായിരുന്നു. ഇന്നലെ വൈകീട്ട് പുതുപ്പിളളി ഇലക്ഷനിലെ വിജയിക്ക് ലഭിക്കുന്ന ഭൂരിപക്ഷത്തെക്കുറിച്ച് ഇരുവരും തമ്മിൽ വാക്കുതർക്കം ഉണ്ടായിരുന്നു. കൊലപാതക ശ്രമത്തിനാണ് പോലീസ് കേസെടുത്തിരിക്കുന്നത്.
ഇൻസ്പെക്ടർ എൻ.എ അനൂപ്, എസ്.ഐ എം.സി ഹരീഷ്, എ.എസ്.ഐ പി.വി.ജോർജ്, എസ്.സി.പി ഒ പി.എ ഷംസു , സി.പി. ഒ ഷിജോ പോൾ എന്നിവരാണ് അന്വേഷണ സംഘത്തിൽ ഉണ്ടായിരുന്നത്.
