തൃശൂർ: ചേറൂരിൽ ഭാര്യയെ കമ്പിപ്പാരകൊണ്ട് തലക്കടിച്ച് കൊലപ്പെടുത്തിയ സംഭവത്തിലേക്ക് പ്രതിയെ നയിച്ചത് സാമ്പത്തിക ഇടപാടുകളിലെ തർക്കവും മറ്റൊരാളുമായി ബന്ധമുണ്ടെന്ന സംശയവുമാണെന്ന് പൊലീസ്. കല്ലടിമൂല സ്വദേശി സുലി (46)യെ ഭർത്താവ് ഉണ്ണികൃഷ്ണൻ (50) ആണ് തലക്കടിച്ച് കൊലപ്പെടുത്തിയത്. ഗൾഫിൽ ജോലി ചെയ്തിരുന്ന ഉണ്ണികൃഷ്ണൻ ജോലി അവസാനിപ്പിച്ച് നാട്ടിലെത്തിയിട്ട് മൂന്നു ദിവസങ്ങളെയായിട്ടുള്ളൂ. ശേഷം ഭാര്യയുമായി തർക്കം പതിവായിരുന്നെന്ന് പൊലീസ് പറയുന്നു.
വിദേശത്തു നിന്നു താൻ ഭാര്യയുടെ അക്കൗണ്ടിലേക്ക് അയച്ച ഒരുകോടിയിലധികം രൂപ കാണാനില്ലെന്നും ഭാര്യക്ക് മൂന്നുലക്ഷം രൂപ കടമുണ്ടെന്നും പ്രതി പൊലീസിനോട് പറഞ്ഞു. മാത്രമല്ല ഭാര്യയ്ക്ക് മറ്റൊരാളുമായി ബന്ധമുണ്ടെന്ന വിവരം തനിക്കു ലഭിച്ചിട്ടുണ്ടെന്നും മൊഴിയിൽ പറയുന്നു. ഇക്കാര്യങ്ങളെച്ചൊല്ലിയുള്ള തർക്കമാണ് കൊലപാതകത്തിലേക്ക് നയിച്ചത്. കൊലയ്ക്കു ശേഷം പ്രതി സ്റ്റേഷനിലെത്തി വിവരമറിയിക്കുകയായിരുന്നു.
