ന്യൂഡല്ഹി: മണിപ്പുര് വിഷയത്തില് പ്രതിപക്ഷം കൊണ്ടുവന്ന അവിശ്വാസ പ്രമേയം ലോക്സഭ ശബ്ദവോട്ടോടെ തള്ളി. പ്രധാനമന്ത്രി നരേന്ദ്രമോദി നടത്തിയ സുദീര്ഘമായ മറുപടി പ്രസംഗത്തിന് പിന്നാലെയാണിത്. അതിനിടെ കോണ്ഗ്രസ് നേതാവ് അധീര് രഞ്ജന് ചൗധരിയെ ലോക്സഭയില്നിന്ന് സസ്പെന്ഡ് ചെയ്തു. അദ്ദേഹം ഉന്നയിച്ച ആരോപണങ്ങളില് പ്രിവിലേജ് കമ്മിറ്റി അന്വേഷണം പൂര്ത്തിയാക്കുന്നതുവരെയാണ് സസ്പെന്ഷന്.
പ്രധാനമന്ത്രി മോദിയുടെ മറുപടി പ്രസംഗത്തിനിടെ പ്രതിപക്ഷം സഭ ബഹിഷ്കരിച്ചു. മണിപ്പൂരിനെക്കുറിച്ച് പ്രധാനമന്ത്രി സംസാരിക്കുന്നതിന് തൊട്ടുമുമ്പായിരുന്നു പ്രതിപക്ഷത്തിന്റെ ഇറങ്ങിപ്പോക്ക്. പറയുന്നത് കേള്ക്കുവാനുള്ള ക്ഷമ പ്രതിപക്ഷത്തിനില്ലെന്ന് പ്രധാനമന്ത്രി കുറ്റപ്പെടുത്തി. മണിപ്പുരില് സമാധാനത്തിന്റെ സൂര്യനുദിക്കുമെന്ന് മറുപടി പ്രസംഗത്തിനിടെ പ്രധാനമന്ത്രി പറഞ്ഞു. അക്രമ സംഭവങ്ങളില് നിരവധിപേര്ക്ക് ജീവന് നഷ്ടമാകുകയും സ്ത്രീകള് ലൈംഗിക അതിക്രമത്തിന് ഇരകളാകുകയും ചെയ്തു. സമാധാനം പുനഃസ്ഥാപിക്കാനുള്ള ശ്രമങ്ങളുമായി കേന്ദ്ര- സംസ്ഥാന സര്ക്കാരുകള് മുന്നോട്ടു പോകുകയാണ്. അവയുടെ ഫലമായി മണിപ്പുരില് സമാധാനത്തിന്റെ സൂര്യന് ഉദിക്കുമെന്ന് ഉറപ്പുണ്ടെന്നും പ്രധാനമന്ത്രി പറഞ്ഞു.
