കാലടി: ആദിശങ്കര ഇൻസ്റ്റിറ്റ്യൂട്ട് ഓഫ് എഞ്ചിനീയറിങ്ങ് ആന്റ് ടെക്നോളജിയിൽ ദേശീയ ടെക്നോ കൾച്ചറൽ ഫെസ്റ്റ് ‘ബ്രഹ്‌മ 2026’ ആരംഭിച്ചു. സിനിമ താരം ശോഭന ഉദ്ഘാടനം ചെയ്തു. ആദി ശങ്കര മാനേജിങ് ട്രസ്റ്റി. കെ ആനന്ദ് അധ്യക്ഷത വഹിച്ചു. തുടർന്ന് ത്യാഗരാജ ആരാധന നടന്നു. അൻപതോളം സംഗീതജ്ഞർ ത്യാഗരാജ ആരാധനയിൽ അണിനിരന്നു. പ്രൊഫ. കുമാര കേരളവർമ, ഡോ. ബി അരുന്ധതി, ഡോ. പ്രീതി, ഡോ. ഭുവനേശ്വരി, അരുൺ കുമാർ, സതീഷ് വർമ്മ, സുശീൽ കുമാർ തുടങ്ങിയവർ നേതൃത്വം നൽകി.
തുടർന്ന് പ്രശസ്ത പിന്നണി ഗായിക ഡോ. ബി അരുന്ധതിക്ക് ആദിശങ്കര സംഗീത ശ്രേഷ്ഠ കലാപുരസ്‌ക്കാരം നൽകി ആദിശങ്കര ട്രസ്റ്റ് മാനേജിംഗ് ട്രസ്റ്റി കെ ആനന്ദ് ആദരിച്ചു. പ്രൊഫ. ഡോ. അച്യുത്ശങ്കർ എസ് നായർ മുഖ്യാഥിതിയായിരുന്നു.പ്രിൻസിപ്പാൾ ഡോ. എം എസ് മുരളി, ലത ആനന്ദ്, ടി എസ് ഹരിഹരൻ തുടങ്ങിയവർ സന്നിഹിതരായിരുന്നു. ഡോ. ബി അരുന്ധതിയുടെ സംഗീത കച്ചേരിയും, അമ്പതോളം പേര് അണിനിരന്ന കലാമണ്ഡലം രതീഷ് നയിച്ച പഞ്ചാരി മേളവും നടന്നു.
7, 8 തീയതികളിൽ ഭരതനാട്യം, കുച്ചിപ്പുടി, മോഹിനിയാട്ടം, വോയ്സ് ഓഫ് ബ്രഹ്‌മ, ബാൻഡ് ഓഫ് ബ്രഹ്‌മ, ഡിജെ വാർ, കൊറിയോ ഈവ്, കലാ ശാസ്ത്ര സാങ്കേതിക മത്സരങ്ങൾ എന്നിവ നടക്കും. അഞ്ച് വേദികളിലാണ് മത്സരങ്ങൾ. ഇന്ത്യയിലെ വിവിധ കോളജുകളിൽ നിന്നുളള പതിനായിരത്തോളം വിദ്യാർഥികൾ ബ്രഹ്‌മയിൽ പങ്കെടുക്കും. 90 മത്സരയിനങ്ങളിലായി 8 ലക്ഷം രൂപയുടെ സമ്മാനങ്ങളാണ് വിദ്യാർത്ഥികൾക്ക് നൽകുന്നത്.
