കാഞ്ഞൂർ സെന്റ് മേരീസ് ഫൊറോന പള്ളിയിലെ വിളിച്ചു വിളികേട്ട വിശുദ്ധ സെബസ്ത്യാനോസിന്റെ തിരുനാളിന് മുന്നോടിയായുള്ള ഒരുക്കങ്ങൾ പൂർത്തിയായി. ഈ വർഷത്തെ തിരുനാൾ1025 വർഷത്തെ ജൂബിലി നിറവിൽ ആഘോഷിക്കുന്നു.തിരുനാൾ സുഗമമായി നടത്തുന്നതിനായുള്ള മുന്നൊരുക്കങ്ങൾ വിലയിരുത്താൻ എം.എൽ.എമാരായ അൻവർ സാദത്ത്, റോജി എം. ജോൺ എന്നിവരുടെ നേതൃത്വത്തിൽ വിവിധ വകുപ്പ് ഉദ്യോഗസ്ഥരുടെ യോഗം ചേർന്നു.
തീർത്ഥാടകർക്ക് ആവശ്യമായ അടിസ്ഥാന സൗകര്യങ്ങൾ ഉറപ്പുവരുത്തുന്നതിനൊപ്പം സുരക്ഷാ ക്രമീകരണങ്ങളിൽ വിട്ടുവീഴ്ചയില്ലാത്ത നടപടികൾ സ്വീകരിക്കാനും യോഗത്തിൽ തീരുമാനമായി.തിരുനാൾ ദിവസങ്ങളിൽ അനുഭവപ്പെടുന്ന വലിയ തിരക്ക് കണക്കിലെടുത്ത് പോലീസിന്റെ പ്രത്യേക സംഘത്തെ സുരക്ഷാ ഡ്യൂട്ടിക്കായി വിന്യസിക്കും. ഗതാഗത കുരുക്ക് ഒഴിവാക്കാൻ വിപുലമായ ട്രാഫിക് നിയന്ത്രണങ്ങളും ഏർപ്പെടുത്തും. തീർത്ഥാടകരുടെ സൗകര്യാർത്ഥം കെ.എസ്.ആർ.ടി.സി ആലുവ, അങ്കമാലി, പെരുമ്പാവൂർ ഡിപ്പോകളിൽ നിന്നും പ്രത്യേക സ്പെഷ്യൽ ?സർവീസുകൾ നടത്തും. തിരുനാളിന് മുൻപായി പള്ളിയിലേക്കുള്ള പ്രധാന റോഡുകളുടെ ടാറിങ് ജോലികളും തെരുവ് വിളക്കുകളുടെ അറ്റകുറ്റപ്പണികളും പൂർത്തിയാക്കാൻ ബന്ധപ്പെട്ട വകുപ്പുകൾക്ക് നിർദ്ദേശം നൽകിയിട്ടുണ്ട്. പള്ളി പരിസരവും പരിസരപ്രദേശങ്ങളും ശുചീകരിക്കുന്നതിനുള്ള നടപടികൾ ഉടൻ പൂർത്തിയാക്കും.
തിരുനാൾ പരിസരത്ത് വിതരണം വിതരണം ചെയ്യുന്ന ഭക്ഷണസാധനങ്ങളുടെ ഗുണനിലവാരം ഉറപ്പുവരുത്താൻ ഫുഡ് സേഫ്റ്റി വിഭാഗം കർശന പരിശോധന നടത്തും. മെഡിക്കൽ ടീമിന്റെയും ആംബുലൻസിന്റെയും സേവനത്തിനൊപ്പം ഫയർഫോഴ്സ് യൂണിറ്റും 24 മണിക്കൂറും സജ്ജമായിരിക്കും. തടസ്സമില്ലാത്ത കുടിവെള്ള വിതരണവും വൈദ്യുതി ലഭ്യതയും ഉറപ്പുവരുത്താൻ വാട്ടർ അതോറിറ്റിക്കും കെ.എസ്.ഇ.ബിക്കും പ്രത്യേക നിർദ്ദേശം നൽകി. അനധികൃത മദ്യവില്പനയും ലഹരി പദാർത്ഥങ്ങളുടെ വ്യാപനവും തടയാൻ എക്സൈസ് വിഭാഗത്തിന്റെ കർശന നിരീക്ഷണം ഉണ്ടാകും.
പരിസ്ഥിതി സൗഹൃദമായ രീതിയിൽ പൂർണ്ണമായും ഗ്രീൻ പ്രോട്ടോക്കോൾ പാലിച്ചായിരിക്കും ഇത്തവണത്തെ ആഘോഷങ്ങൾ. കേരളത്തിന്റെ വിവിധ ഭാഗത്തുനിന്നും എത്തുന്ന നാന ജാതി മതസ്ഥർക്ക് സുഗമമായ ദർശനത്തിനും നേർച്ചകാഴ്ചകൾ അർപ്പിക്കുന്നതിനും ആവശ്യമായ എല്ലാ സംവിധാനങ്ങളും സജ്ജമാണെന്ന് വികാരി ഫാ. ജോയി കണ്ണംമ്പുഴയും തിരുനാൾ കമ്മറ്റി ജനറൽ കൺവീനർ ജോയി ഇടശ്ശേരിയും അറിയിച്ചു.
അഡീഷണൽ ജില്ലാ മജിസ്ട്രേറ്റ് വിനോദ് രാജ്,എ എസ് പി ഹർദിക്ക് മീണ, തിരുനാൾ കമ്മിറ്റി ഭാരവാഹികളായ ബിജു പെരുമായൻ, ജോഷി ചേറ്റുങ്ങൽ ജോജി പുതുശേരി, ലിജോ ഐക്കരേത്ത്, ട്രസ്റ്റ് മാരായ ജോസ് പാറക്കൽ, ജോസി കോഴിക്കാടൻ വിവിധ വകുപ്പ് ഉദ്യോഗസ്ഥർ തുടങ്ങിയവർ പങ്കെടുത്തു.
ജനുവരി 19, 20 തീയതികളിലാണ് തിരുനാൾ, എട്ടാമഠം 26 27
