കാലടി: ആദിശങ്കര ട്രസ്റ്റിന്റെ ഈ വർഷത്തെ ശങ്കര പുരസ്കാരം മലയാള സിനിമയിലെ ഗാനരചയിതാവും ബഹുമുഖ പ്രതിഭയുമായ ശ്രീകുമാരൻ തമ്പിയ്ക്ക്. ഒരു ലക്ഷത്തി ഒന്ന് രൂപയും വെങ്കല ശില്പവും അടങ്ങുന്നതാണ് പുരസ്കാരം. ഈ മാസം 20 ന് വൈകിട്ട് 6 ന് ശ്രീശാരദ വിദ്യാലയത്തിൽ ചേരുന്ന ചടങ്ങിൽ ആദിശങ്കര മാനേജിംഗ് ട്രസ്റ്റി കെ. ആനന്ദ് പുരസ്കാരം സമ്മാനിക്കും. റോജി എം.ജോൺ എം.എൽ.എ., സംസ്ഥാന ചലച്ചിത്ര പുരസ്കാര ജേതാവും ഗായകനുമായ കെ.എസ്. സുദീപ് കുമാർ തുടങ്ങിയവർ ചടങ്ങിൽ സംബന്ധിക്കും.
മലയാള ചലച്ചിത്ര ഗാന രചയിതാവ്, കവി, സംവിധായകൻ, തിരക്കഥാകൃത്ത്, നിർമ്മാതാവ് , നോവലിസ്റ്റ് തുടങ്ങി വിവിധ മേഖലകളിലെ പ്രാഗത്ഭ്യം പരിഗണിച്ചാണ് അവാർഡിന് തെരഞ്ഞെടുത്തതെന്ന് ആദിശങ്കര ട്രസ്റ്റ് മാനേജിംഗ് ട്രസ്റ്റി കെ. ആനന്ദ് അറിയിച്ചു.
ഗായിക കെ.എസ്.ചിത്ര, ഗായകരായ ജി.വേണുഗോപാൽ, ഉണ്ണി മേനോൻ , ഐ.എസ്.ആർ.ഒ മുൻ ഡയറക്ടർ എസ്. സോമനാഥ് , നടനും നർത്തകനുമായ വിനീത്, ചെസ് ചാമ്പ്യൻ പ്രഗ്നാനന്ദ തുടങ്ങിയവർ മുൻ വർഷങ്ങളിൽ ഈ പുരസ്ക്കാരത്തിന് അർഹരായിട്ടുണ്ട്.
