കാലടി: ഡയാലിസിസ് ചെയ്യുന്ന വൃക്ക രോഗികൾക്ക് പ്രത്യാശയുടെ കിരണവുമായി ക്യാറ്റ്സ് ക്ലബ്ബും ടോളിൻസ് ഗ്രൂപ്പും. ‘ക്യാറ്റ്സ്-ഹോപ്പ്’ എന്ന് പേരിട്ടിരിക്കുന്ന പദ്ധതി വഴി അങ്കമാലി ലിറ്റിൽ ഫ്ലവർ ആശുപത്രിയിൽ ഡയാലിസിസ് ചെയ്യുന്ന കാലടിയിലും പരിസരപ്രദേശങ്ങളിലുമുള്ള രോഗികൾക്കാണ് ആഴ്ചയിൽ ഒരു ഡയാലിസിസ് വീതം അടുത്ത ഒരു വർഷത്തേക്ക് നൽകുന്നത്. കാലടിയിലെ വ്യവസായ പ്രമുഖരായ ടോളിൻസ് ഗ്രൂപ്പും അവരുടെ സി.എസ്.ആർ. ഫണ്ട് വിനിയോഗിച്ച് പദ്ധതിയിൽ പങ്കാളികളാവുന്നു.
പദ്ധതിയുടെ ഉദ്ഘാടനം ഒക്ടോബർ 29 ബുധനാഴ്ച്ച സുപ്രീം കോടതി റിട്ട. ജസ്റ്റിസ് കുര്യൻ ജോസഫ് നിർവ്വഹിക്കും. ക്ലബ് പ്രസിഡന്റ് ജെസ്റ്റോ പോൾ അധ്യക്ഷത വഹിക്കുന്ന ചടങ്ങിൽ എൽ.എഫ്. ആശുപത്രി ഡയറക്ടർ ഫാ. ജേക്കബ് പാലക്കാപ്പിള്ളി മുഖ്യപ്രഭാഷണം നടത്തും. ഡയാലിസിസ് കൂപ്പൺ വിതരണം പദ്ധതിയിൽ പങ്കാളിയായ ടോളിൻസ് ഗ്രൂപ്പ് ചെയർമാൻ ഡോ. കെ.വി. ടോളിൻ നിർവഹിക്കും. ക്ലബ് സെക്രട്ടറി പി.എ.ജോയി, പ്രൊജക്റ്റ് കോർഡിനേറ്റർ സി.ഡി.ജോയി എന്നിവർ സംസാരിക്കും. കാലടി-കാഞ്ഞൂർ റൂറൽ സഹകരണ ബാങ്ക് ഓഡിറ്റോറിയത്തിൽ വച്ച് വൈകീട്ട് 5.30 നാണ് ചടങ്ങ്.
കഴിഞ്ഞ 55 വർഷമായി കാലടിയിൽ പ്രവർത്തിച്ചുവരുന്ന ജീവകാരുണ്യ- സന്നദ്ധ സേവന സംഘടനയാണ് ക്യാറ്റ്സ് ക്ലബ് എന്ന ചുരുക്കിപേരിൽ അറിയപ്പെടുന്ന ചാരിറ്റി ആൻഡ് ട്രൂത്ത്ഫുൾ സർവീസ് ക്ലബ്. ഓരോ വർഷവും പൊതുനന്മ ലക്ഷ്യമാക്കിയുള്ള പദ്ധതികൾ നടപ്പാക്കി വരുന്നു. 56-)o വർഷത്തിൽ ക്ലബ് ഏറ്റെടുത്തിരിക്കുന്ന പദ്ധതിയാണ് ‘ക്യാറ്റ്സ്-ഹോപ്പ്’.
